4
Në këtë ceremoni morën pjesë ministri i Mbrojtjes, Ejup Maqedonci, zëvendësministri i Mbrojtjes, Adnan Rexhepllar, zëvendëskomandanti i FSK-së, gjeneralmajor Enver Cikaqi, ambasadori i Turqisë në Kosovë, Sabri Tunç Angili, ministri i Zhvillimit Rajonal, Fikrim Damka, dhe shefi grupit parlamentar multietnik, Enis Kervan.
Në fjalën e tij përshëndetëse, ministri Maqedonci i uroi mirëseardhje të pranishmëve dhe të gjithë zyrtarëve, oficerëve dhe nënoficerëve të komunitetit turk i uroi shënimin e ditës së tyre kombëtare.
Ministri theksoi se komuniteti turk gëzon një respekt të veçantë të cilët e kanë fituar me punën dhe përkushtimin e tyre në institucionet e Kosovës. Ai shprehu angazhimin e tij maksimal që në Ministrinë e Mbrojtjes dhe FSK të rritet numri i pjesëtarëve të komuniteteve pakicë, duke përfshirë dhe komunitetin turk.
Ndërsa, zëvendëskomandanti i FSK-së, gjeneralmajor Enver Cikaqi, theksoi se historia e angazhimit të komunitetit turk dhe kontributi i këtij komuniteti është në të gjitha fazat e krijimit të shtetit tonë dhe veçanërisht në ndërtimin e FSK-së. Ai nënvizoi se pjesëtarët e komunitetit turk brenda FSK-së shërbejnë si një urë lidhëse e fuqishme në mes të Kosovës dhe Republikës së Turqisë.
Të pranishmëve në këtë ceremoni gjithashtu me një fjalë rasti iu drejtuan edhe ambasadori i Republikës së Turqisë në Kosovë, Sabri Tunç Angili, ministri i Zhvillimit Rajonal, Fikrim Damka dhe shefi grupit parlamentar multietnik, Enis Kervan.