Ministri i Mbrojtjes, Ejup Maqedonci, priti sot në takim një grup diplomatësh evropianë dhe ekspertësh, në kuadër të iniciativës “The Enlargement Strategic Dialogues”, të organizuar nga Qendra Austro-Franceze për Afrimin në Evropë, me mbështetjen e “Open Society Foundations”.
Me këtë rast, diskutuan së bashku për zhvillimet në Ministrinë e Mbrojtjes dhe në Forcën e Sigurisë së Kosovës, për procesin e zhvillimit të kapaciteteve dhe për situatën e sigurisë në rajon e më gjerë.
Ministri Maqedonci ndau me të pranishmit këndvështrimin e Kosovës mbi kërcënimet hibride dhe sfidat e sigurisë, si dhe masat që ndërmerren së bashku me partnerët tanë për t’u përballur me to.
“E arritur e rëndësishme gjithashtu është kontributi i Kosovës përtej kufijve tanë, përmes angazhimit në operacione nderkombëtare në mbështetje të paqes në Evropë dhe në Lindjen e Mesme”, theksoi ministri me këtë rast.
Republika e Kosovës është e përkushtuar të ndërtojë një forcë moderne dhe profesionale, por njëkohësisht të jetë edhe kontribuese aktive në sigurinë dhe paqen në botë.
