Pjesëmarrësit e Kursit të Lartë për Mbrojtje dhe Siguri të Republikës së Shqipërisë vizitojnë Ministrinë e Mbrojtjes dhe Forcën e Sigurisë së Kosovës

Në Ministrinë e Mbrojtjes sot u prit një delegacion i pjesëmarrësve vijues të kursit dhe stafi akademik i Kursit të Lartë për Mbrojtje dhe Siguri i Akademisë së Forcave të Armatosura të Republikës së Shqipërisë, i kryesuar nga zëvendëskomandanti i Akademisë njëherësh edhe përgjegjës i kursit, kolonel Edmond Vraneshi.
Delegacioni nga Shqipëria u prit nga drejtori i Departamentit për Bashkëpunim Ndërkombëtar dhe Integrime Euro-Atlantike, kolonel Agron Bajrami, i cili në emër të drejtuesve të Ministrisë së Mbrojtjes përshëndeti mysafirët dhe vlerësoi lart vizitën e kursantëve nga Shqipëria, Greqia, Britania e Madhe, Gjeorgjia, Kroacia, Maqedonia e Veriut, Turqia dhe Italia.
Më pas, kolonel Haki Hoti, drejtor i Departamentit për Transformim, Modernizim dhe Standardizim, bëri një prezantim lidhur me historikun e ngritjes, zhvillimit dhe tranzicionit të Forcës së Sigurisë së Kosovës, duke filluar nga Rishikimi i Strategjisë së Sektorit të Sigurisë së Kosovës, miratimi i ligjeve për Ministrinë e Mbrojtjes dhe FSK-në dhe tani për Procesin Gjithëpërfshirës të Tranzicionit të Forcës.
Gjithashtu, oficerët pjesëmarrës të kursit me anë të pyetjeve shprehën interesimin e tyre për tematikën e prezantuar lidhur me ngritjen dhe zhvillimin e Forcës, procesin e tranzicionit dhe planet për zhvillimin e saj në të ardhmen.
Oficerët e lartë, pjesë e delegacionit të KLMS-së, vizituan edhe Shtabin e Përgjithshëm të FSK-së në kazermën ,,Adem Jashari’ në Prishtinë si dhe Komandën e Doktrinës dhe Stërvitjes në kazermën ,,Skënderbeu’’ në Ferizaj, ku u njoftuan nga afër me misionin, detyrat dhe aktivitetet e tyre.
Qëllimi mësimor i vizitës së KLMS-së ishte njohja me institucionet e sigurisë shtetërore dhe ndërkombëtare që operojnë në Kosovë, dhe se si është institucionalizuar koncepti i sigurisë bashkëpunuese në rastin e Kosovës.

This site uses cookies to offer you a better browsing experience. By browsing this website, you agree to our use of cookies.