Njoftim publik i ministrit të mbrojtjes Armend Mehaj lidhur me Fondin e Sigurisë

Të dashur qytetarë,
Bashkëkombës tanë,
Miq të vendit dhe popullit tonë liridashës dhe paqedashës,
Për Atdheun tonë, Lirinë dhe Pavarësinë e saj, dhamë shumë gjak, djersë, mund e para nga puna jonë e ndershme, në të gjitha periudhat e historisë sonë të dhimbshme e të lavdishme.
Një vullnet shumë të madh për të dhuruar donacione në mjete financiare për institucionet e sigurisë së vendit, e keni shprehur gjithmonë.
Ka një kohë të gjatë që jemi duke punuar në themelimin e Fondit të Sigurisë, në të cilin qytetarët tanë mund të kontribuojnë me mjete financiare dedikuar sigurisë në vend.
Jam shumë i lumtur që më në fund kjo punë intensive u finalizua dhe sot me nënshkrimin e vendimit nga ana e kryeministrit të Kosovës z. Albin Kurti, ky fond do të jetë i hapur.
Vlerën e shenjtë të Lirisë dhe Pavarësisë së Atdheut tonë që e paguam shumë shtrenjtë, jemi të vendosur ta ruajmë me çdo çmim.
Siguria jonë kurrë nuk ka nënkuptuar pasiguri për të tjerët. Përkundrazi, dje, sot dhe nesër, ishim, jemi e do të jemi siguri e mbrojtje për të gjithë, pa dallim.
Të kontribuojmë së bashku, për të mirën e institucioneve tona të mbrojtjes dhe sigurisë.
Për garantuesit e Lirisë, Pavarësisë, Sovranitetit dhe Integritetit territorial të vendit.
Për garantuesit e jetërave dhe pronave tona, garantuesit e sigurisë dhe rendit tonë publik.
Nesër do të bëjmë publike të gjitha informacionet, lidhur me llogarinë dhe detajet tjera, se si mund të jepni donacionet tuaja.
Urime të gjithëve!
This site uses cookies to offer you a better browsing experience. By browsing this website, you agree to our use of cookies.