Ministri Mehaj inspektoi Stërvitjen fushore „Kampi i Avancuar 2021” të Qendrës për Studime Universitare

Me qëllim të njohjes nga afër me nivelin e demonstrimit profesional, ministri i Mbrojtjes, Armend Mehaj i shoqëruar nga zv.komandanti i FSK-së gjeneral major Enver Cikaqi, ishte në Aeroportin e Gjakovës për të ndjekur stërvitjen fushore „Kampi i Avancuar 2021”, të realizuar nga kadetët e Qendrës për Studime Universitare (QSU) të Forcës së Sigurisë të Kosovës. Stërvitja përkatëse, si pjesë e programit akademik dhe profesional, është realizuar nga data 7 qershor dhe përfundon më 18 qershor.Me këtë rast, ministri Mehaj u shprehë i kënaqur me përgatitjen e përgjithshme të kadetëve dhe me sukseset e QSU-së në përgjithësi. Ai theksoi se kjo stërvitje është një sfidë për të gjithë, dhe se performancën e demonstruar e vlerësoi lart duke i përgëzuar të gjithë për përmbyllje shumë të suksesshme të këtij viti akademik. Gjithashtu ministri Mehaj potencoi se ndër synimet e tij është avancimi edhe më i madh i kapaciteteve të shkollimit ushtarak në të gjitha nivelet sipas standardeve më të avancuara të vendeve të NATO-s duke i inkurajuar të gjithë për angazhim dhe përkushtim sa më të lartë në studime në mënyrë që karriera ushtarake të realizohet me vetëbesim dhe kompetencë të lartë profesionale.

This site uses cookies to offer you a better browsing experience. By browsing this website, you agree to our use of cookies.